Ay soghwaro aaho buka ka maqaam hai
ab ruqsat e hussain alai-his salaam hai
mehmaan tumhara jaata hai jo tashna kaam hai
sar peeto khaak udao ke maatam tamam hai
ab wo sada e haye hussaina na aayegi
ghar may tumhare fatema zehra na aayegi
ay shaah e karbala teri qidmat na ho saki
ay kushta e jafa teri qidmat na ho saki
ay jaane fatema teri qidmat na ho saki
mehman e nainawa teri qidmat na ho saki
jee bhar ke ro sake na ye gardish naseeb ki
majlis ye aakhri hai hussain e ghareeb ki
agle baras hussain moharram may aayenge
baaqi rahi hayaat to ye gham manayenge
aur fatema ke laal par aansoo bahayenge
gar mar gaye to qabr may hum khaak udayenge
tayyar khaafela hai shah e mashraqain ka
lo karbala ko jaata hai kunba hussain ka
abbas e ba-wafa ali akbar na jaaiye
jhoole ko khaali chod ke asghar na jaaiye
lekar baraat qasim e bepar na jaaiye
veeran makaan hota hai sarwar na jaaiye
aayi sada na rowo azaadar aayenge
phir agle saal apne bhare ghar ko layenge
bin byaah noujawan ali akbar bhi aayenge
nasgj e akan je saath baradar bhi aayenge
bano ki godh may ali asghar bhi aayenge
noushaah banke qasim e bepar bhi aayenge
zainab ka haat thaame sakina bhi aayegi
ek shab ki byahi fatima kubra bhi aayegi
zainab ke laal baandh ke hathyaar aayenge
sughra mareez abid e beemaar aayenge
shabbar ke saath hyder e karrar aayenge
zehra ko thaame ahmed e mukhtar aayenge
dil kyun na beqarar ho binte rasool ka
majrooh aaj tak bhi hai pehlu batool ka
bechain fatema hai na aansu bahao tum
mai jaa raha hoon roke na mujh ko rulao tum
zehmat na ho to meri ziyarat ko aao tum
turbat pe aake ashkon ki chadar chadhao tum
mehman jo karbala may mere paas aayenge
un sab ki peshwaai ko abbas aayenge
lo alvida hota hai ruqsat ye tashna kaam
tum ro rahe ho maah e muharram se subho shaam
kausar pe apne haath se doonga mai bhar ke jaam
ruqsat hussain hota hai tum par mera salaam
dono jahan may khush raho aur shaad tum raho
amma duayein dethi hai aabad tum raho
haan aashiqo hussain ki aaho buka karo
zehra ka saath do madad e mustafa karo
haqq e mohabbat e shah e bekas ada karo
ab kooch hai hussain ka mehshar bapa karo
lo ab vida kijiyo aal e rasool ko
do aakhri hussain ka pursa batool ko
ay tashna kaam o bekas o nakaam alwida
ay mubtela e hasrat o aalam alwida
ay be-kafan ali ke gul andaam alwida
mazbooh taygh e shimr bad anjaam alwida
mazlumiyat pe aap ki jaan apni khoyenge
jab tak hai zinda aap ke maatam may royenge
ay shah e karbala e moalla salaam lo
hum bekason ke waali o maula salaam lo
aaqa salaam lo shah e waala salaam lo
ay fatema ke chand hamara salaam lo
ruqsath ye aakhri hai dilafgaar aaye hai
maula salaam lo ye azadaar aaye hai
